فیفا ورلڈ کپ کی 96 سالہ تاریخ میں پہلی بار ایک ہی ایڈیشن میں 3 مختلف کھلاڑی سا7ت یا اس سے زیادہ گول کرنے میں کامیاب ہو گئے ہیں جس کے بعد گولڈن بوٹ کی دوڑ ایک تاریخی مرحلے میں داخل ہو گئی ہے۔
ناروے کے اسٹار اسٹرائیکر ارلنگ ہالینڈ نے برازیل کے خلاف پری کوارٹر فائنل میں دو گول کر کے نہ صرف اپنی ٹیم کو ایک یادگار فتح دلائی بلکہ لیونل میسی اور کیلیان ایمباپے کے ساتھ گولڈن بوٹ کی فہرست میں مشترکہ پہلی پوزیشن بھی حاصل کر لی۔
گولڈن بوٹ کی دوڑ میں تاریخی سہ فریقی مقابلہ
چند روز قبل تک ایسا لگ رہا تھا کہ فیفا ورلڈ کپ 2026 میں ٹاپ اسکورر بننے کی دوڑ صرف ارجنٹائن کے لیونل میسی اور فرانس کے کیلیان ایمباپے کے درمیان ہوگی۔
میسی نے کیپ وردے کے خلاف شاندار کارکردگی کے بعد 7 گول مکمل کیے تھے جبکہ ایمباپے نے پیراگوئے کے خلاف میچ میں یہ ہندسہ حاصل کیا۔
تاہم ارلنگ ہالینڈ نے برازیل کے خلاف سنسنی خیز فتح میں 2 گول کر کے اس مقابلے کو تاریخ کے منفرد ترین مقابلوں میں تبدیل کر دیا۔ فیفا ورلڈ کپ کی تاریخ میں یہ پہلا موقع ہے کہ 3 کھلاڑی ایک ہی وقت میں 7،7 گول کے ساتھ گولڈن بوٹ کی دوڑ میں سرفہرست ہیں۔
گولڈن بوٹ کی دوڑ میں کون آگے ہے؟
کیلیان ایمباپے (فرانس) 7 گول، 2 اسسٹ
لیونل میسی (ارجنٹائن) 7 گول
ارلنگ ہالینڈ (ناروے) 7 گول
ہیری کین (انگلینڈ) 6 گول، 1 اسسٹ
عثمان ڈیمبیلے (فرانس) 4 گول، 2 اسسٹ
میکل اویارزابال (اسپین) 4 گول، 1 اسسٹ
انگلینڈ کے کپتان ہیری کین بھی اس دوڑ میں مضبوط امیدوار کے طور پر موجود ہیں جبکہ اسپین اور فرانس کے دیگر کھلاڑی بھی اپنی ٹیموں کے اگلے مرحلے تک پہنچنے کی صورت میں اس فہرست میں اوپر آ سکتے ہیں۔
گولڈن بوٹ کا فیصلہ کیسے ہوتا ہے؟
فیفا گولڈن بوٹ ایوارڈ ورلڈ کپ کے اختتام پر سب سے زیادہ گول کرنے والے کھلاڑی کو دیا جاتا ہے۔ اگر 2 یا زیادہ کھلاڑیوں کے گول برابر ہوں تو سب سے زیادہ اسسٹ کرنے والے کھلاڑی کو ترجیح دی جاتی ہے۔
اگر گول اور اسسٹ دونوں برابر ہوں تو پھر کم وقت میں زیادہ کارکردگی دکھانے والے کھلاڑی کو فاتح قرار دیا جاتا ہے۔
فرانس کے کیلیان ایمباپے جنہوں نے قطر ورلڈ کپ 2022 میں 8 گول کر کے گولڈن بوٹ جیتی تھی اب تاریخ میں 2 مرتبہ یہ اعزاز جیتنے والے پہلے کھلاڑی بننے کے لیے بھی کوشاں ہیں۔
ریکارڈز کی دوڑ بھی جاری
ورلڈ کپ کے ایک ہی ایڈیشن میں سب سے زیادہ گول کرنے کا ریکارڈ فرانس کے جسٹ فونٹین کے پاس ہے جنہوں نے سنہ 1958 کے ورلڈ کپ میں 13 گول کیے تھے۔ ان کے بعد ہنگری کے سینڈور کوکسیس نے سنہ 1954 میں 11 جبکہ جرمنی کے گیرڈ مولر نے سنہ 1970 میں 10 گول کیے تھے۔
دوسری جانب ورلڈ کپ کی تاریخ میں مجموعی طور پر سب سے زیادہ گول کرنے والے کھلاڑیوں کی فہرست میں لیونل میسی 20 گول کے ساتھ سرفہرست ہیں جبکہ کیلیان ایمباپے 19 گول کے ساتھ ان کے تعاقب میں ہیں۔ جرمنی کے میروسلاو کلوزے 16، برازیل کے رونالڈو 15 جبکہ ہیری کین اور گیرڈ مولر 14، 14 گول کے ساتھ نمایاں کھلاڑیوں میں شامل ہیں۔
کیا کرسٹیانو رونالڈو واپسی کر سکتے ہیں؟
پرتگال کے تجربہ کار کپتان کرسٹیانو رونالڈو اب تک 4 میچوں میں 3 گول کر چکے ہیں۔
اگرچہ وہ اس وقت گولڈن بوٹ کی دوڑ میں سرفہرست کھلاڑیوں سے پیچھے ہیں تاہم اگر پرتگال ٹورنامنٹ میں مزید آگے بڑھتا ہے تو رونالڈو کے پاس بھی اس تاریخی دوڑ کا حصہ بننے کا موقع موجود ہے۔
فیفا ورلڈ کپ 2026 کے آخری مراحل میں داخل ہونے کے ساتھ ہی گولڈن بوٹ کی یہ تاریخی جنگ شائقین فٹبال کی توجہ کا مرکز بن چکی ہے اور اب دیکھنا یہ ہے کہ میسی، ایمباپے، ہالینڈ، ہیری کین یا رونالڈو میں سے کون تاریخ رقم کرتا ہے۔
